Bain haja la pandemia demussà, quant impurtanta che la lavur da tgira saja, ma er sut cundiziuns normalas lavuria il persunal da tgira sur il cunfin da squitsch.
Fin l'onn 2030 dovri tenor l'associaziun svizra da tgirunzas e tgirunz 65'000 persunas supplementaras en il mastergn. Las cifras per las scolaziuns sajan dentant bler memia bassas. Tar las tgirunzas ed ils tgirunz diplomads na vegnia scolada gnanc mez uschè blera glieud sco necessari. En pli bandunia er anc prest mintga segunda persuna puspè il mastergn ed actualmain sajan bun 11'000 plazzas vacantas.
Dasper in'offensiva da scolaziun dovria tenor l'associaziun anc ulteriurs pass en la cuntraproposta per l'iniziativa da tgira. Las tgirunzas ed ils tgirunz stoppian avair avunda temp per ils pazients e las pazientas e l'attractivitad dal mastergn stoppia sa meglierar per che quels cun la scolaziun restian er en il mastergn.
