La cifra da cas da corona crescha cuntinuadamain. Mintga di datti novs records negativs. Uss reageschan trais chantuns cun ulteriuras restricziuns.
Chantun Son Gagl
En il chantun da Son Gagl valan a partir da mardi mesiras pli severas cunter il coronavirus en chasas d’attempads e da tgira. Uschia pon ils cussadents retschaiver be anc 2 visitas a di. Plinavant ston ils visitaders s’annunziar avant e resguardar mesiras da protecziun pli severas, sco la chanzlia chantunala scriva. Sche las novas mesiras na gidian betg – vul il Cussegl guvernativ da Son Gagl prender ulteriuras mesiras la fin d’emna che vegn.
Chantun Sviz
En il chantun Sviz è davent davent da damaun scumandadas occurrenzas privatas cun dapli che 10 persunas ed ulteriuras occurrenzas cun dapli che 30 persunas, ha communitgà la regenza da Sviz suenter ina seduta extraordinaria. Vitiers ha la regenza decidì in obligatori da mascrina en l'interiur. Las mesiras fin uss dal chantun e da la Confederaziun na tanschian betg, scriva il chantun Sviz.
Chantun Appenzell Dadora
Davent da damaun vala en l'entir chantun Appenzell Dador in'obligatori general da purtar mascrina. La situaziun en il chantun sco era en l'entira Confederaziun pudessia daventar incontrollabla, scriva il chantun en ina communicaziun. Davent da mesanotg van en vigur las reglas pli severas che correspundan a las mesiras ch'il Cussegl federal ha tramess als chantuns per consultar. En l'entir Appenzell Dador èsi da purtar mascrina ad occurrenzas publicas, fieras sco er en tuts spazis publics interns ed externs. Scumandadas èn er occurrenzas cun passa 50 persunas ed emprovas u concerts da chors.
