La branscha d'assicuranzas svizra ha pudì augmentar l'onn passà il volumen da premias per 3%. Quest augment na saja però betg mo d'attribuir a las premias pli autas mabain er a la dumonda robusta aifer la societad, ha ditg il directur da l’associaziun Urs Arbter mardi a chaschun d'ina conferenza da medias.
Uschia saja l'augment dal volumen da premias tar assicuranzas da chaussas sco vehichels surtut da declerar cun ils custs da reparatura pli auts. Vegnì vitiers sajan per exempel donns chaschunads da la granella extraordinari ferma en il Tessin. Quella haja chaschunà marcantamain dapli donns totals cumpareglià cun ils donns da l'aura da pli baud.
Il pitschen augment constatescha la branscha er tar las assicuranzas da malsauns supplementaras. Qua saja il volumen creschì per 2,5%, malgrà che las premias sezzas sajan creschidas mo levamain.
