La Photoschweiz è la pli gronda exposiziun per fotografia da la Svizra. Quest onn mussan prest 300 fotografas e fotografs naziunals e singuls internaziunals lavurs actualas. Mintg'onn dat l'exposiziun d'ovras in'invista represchentativa en la lavur fotografica da la Svizra. L'exposiziun attira mintg'onn radund 25'000 visitadras e visitaders.
Medemamain han lieu exposiziuns spezialas spectacularas che approfundeschan a moda impressiunanta temas contemporans, diversitad e tecnologia.
Mintg'onn envida l'organisatura «Photointernational» fotografas e fotografs da trametter lur ovras – l'uschenumnà «Call for Entries».
Amaturas da la fotografia e profis pon inoltrar lur lavurs dals ultims 12 mais.
Process da selecziun
Or da tut las entradas datti ina selecziun. En ina prima fasa decida ina curatura sch'ina ovra duai sa tschentar sin via directa en l'exposiziun, sch'ella na sa cunfa betg u sch'i dat potenzial.
Ha in'ovra potenzial ma na persvada anc betg dal tuttafatg sa tschenta ella tar in cussegl da curaturas e curaturs che dat in parairi.
Las lavurs per l'exposiziun 2026 avevan ins pudì inoltrar fin la fin october da l'onn passà.
L'exposiziun Photoschweiz è anc da vesair fin mardi, ils 10 da favrer, en il Kongresshaus a Turitg.
Sut la surfatscha – las ovras grischunas a la Photoschweiz
Quest onn preschentan era quatter fotografas ed ina fotografas dal Grischun lur ovras. Lur lavurs mussan quant vast ch'il spectrum da la fotografia regiunala è – da purtrets sut aua sur fotografias dal tschiel e da cuntrada fin a detagls pauc vis.
Stefanie Blochwitz – nua che umans perdan lur mascras
La fotografa da Cuira Stefanie Blochwitz preschenta cun «Under the Surface» ina seria da purtrets sut aua che mussa umans en muments da agravitaziun. Sut aua crodan tenutas usitadas, uschia ch'i resultan purtrets intims e reducids.
René Bärtsch – tranter grip e dialogs
Il fotograf da Cuira René Bärtsch mussa duas serias.
La chavorgia da l'Aara – in'observaziun precisa da colurs, glisch e structuras da grip da la chavorgia a Meiringen.
Pas de deux – Pèrs da maletgs or da motivs nunspetgads che han pir in effect cuminaivlamain.
-
Bild 1 von 3. «Aareschlucht». Bildquelle: René Bärtsch.
-
Bild 2 von 3. «Die Hängebrücke und ihr Darunter». La Pendenta, Mustér. Bildquelle: René Bärtsch.
-
Bild 3 von 3. «Die Hängebrücke und ihr Darunter». La Pendenta, Mustér. Bildquelle: René Bärtsch.
Roman Cantieni – il mund zuppà
Roman Cantieni, il giuven da 24 onns oriund da l'Engiadina, documentescha cun fotografias spontanas da macro e d'animals muments ch'ins na vesa savens betg.
Peter Flury – la bellezza quieta dals bulieus
Peter Flury dad Igis drizza ses focus sin bulieus ch'el inscenescha sco furmas natiralas coluradas e filigranas. Ses maletgs mussan la diversitad d'in microcosmos savens survesì e misterius.
Oliver Lengacher – aua e stailas
Oliver Lengacher, fotograf da Cuira, è represchentà cun duas serias.
Aua – funtauna da la vita – in omagi a la forza, a la quietezza ed a bleras furmas, en las qualas l'aua caracterisescha noss ambient.
Il tschiel nocturn – maletgs dal tschiel stailì da differents lieus en Svizra che laschan percorscher la vastadad da l'univers ed il silenzi da la notg.
-
Bild 1 von 2. «Fundogn (Alp Nurdagn)». Bildquelle: Oliver Lengacher.
-
Bild 2 von 2. «Landwasserviadukt». Bildquelle: Oliver Lengacher.