Photoschweiz 2026 - Quai èn stadas las ovras grischunas a l'exposiziun da quest onn

Mintg'onn envida l'organisatura «Photointernational» fotografas e fotografs da trametter lur ovras – l'uschenumnà «Call for Entries».
Amaturas da la fotografia e profis pon inoltrar lur lavurs dals ultims 12 mais.

Process da selecziun

Or da tut las entradas datti ina selecziun. En ina prima fasa decida ina curatura sch'ina ovra duai sa tschentar sin via directa en l'exposiziun, sch'ella na sa cunfa betg u sch'i dat potenzial.

Ha in'ovra potenzial ma na persvada anc betg dal tuttafatg sa tschenta ella tar in cussegl da curaturas e curaturs che dat in parairi.

Las lavurs per l'exposiziun 2026 avevan ins pudì inoltrar fin la fin october da l'onn passà.

Signur Cantieni, Vus descrivais la fotografia sco schlargiament da la memoria umana. Pudais vus numnar in exempel concret, co che Vossas fotografias han tschiffà insatge che sulettamain Vossa memoria n'avess betg pudì conservar?

Mintga giada cura che jau guard maletgs vegls, chat jau maletgs dals quals jau na poss betg pli ma regurdar. Nossa memoria umana vegn diffusa, maschadada ed inconstanta cun il temp. La camera mantegna mintga singul pixel in ad in uschia sco quai ch'igl era effectivamain.

I n'è betg Vossa emprima giada a la Photoschweiz – tge motivescha Vus da preschentar danovamain ina lavur a la pli gronda exposiziun d'ovras da la Svizra?

Sche jau vi ma participar ad in'exposiziun, vegn jau sfurzà da destillar millis maletgs sin mes favurits e da sviluppar in concept. Plinavant less jau metter dapli a la glisch la macrofotografia sutpreschentada e nizzegiar la chaschun per malaschar inspirar d'auters stils ed entrar en contact.

Vus essas student da medischina e fotograf amatur. Co influenzescha Vossa scolaziun medicinala Vossa fotografia?

Jau na maschaid betg la fotografia cun mia scolaziun. Jau dovrel la fotografia sco cumpensaziun per il studi stressant.

En la descripziun da Vossas ovras da quest onn pon ins leger che Vus fotografais spontanamain or da l'observaziun. La macrofotografia pretenda dentant savens ina preparaziun speziala ed in equipament. Co gartegia quai tuttina?

La gronda part da mias fotografias fatsch jau sin viadis, durant viandar u en il quartier, nua che jau abitesch. L'art è d'avair adina avert ils egls adina e d'avair pront la camera uschè savens sco pussaivel. Cun il chametg e diffusur portabel è la preparaziun limitada.

Vus schais che Vus faschais visibel l'invisibel. Pudais dar in exempel specific per ina da Vossas fotografias che ha revelà insatge che la publicitad n'avess uschiglio mai vis?

Il bau-sablun (maletg sura en la gallaria) è il meglier exempel. Da lunsch davent para il bau starmentus brin u nair. Pir cun guardar pli detagliadamain percorsch'ins ch'el traglischa en tuttas colurs.

Tge èn Vossas ambiziuns e finamiras en la fotografia?

Mias ambiziuns èn da ma sviluppar cuntinuadamain, senza finamira sco punct final. Tar mai stattan adina il plaschair e la fascinaziun en il center. In project futur è quel da generar ina plivalur per cudeschs tematics e per publicaziuns.

Avais Vus gia ponderà da viver en emprima lingia da la fotografia?

Gea, quai hai jau gia ponderà. Jau sun vegnì a la conclusiun che jau giaud la libertad da far maletgs senza squitsch. Jau less en emprima lingia fotografar per mai, senza l'idea ch'els stoppian vender bain.