Cunquai che las guglias dal pign èn er durant l’enviern da colur verda, valeva il pign tar ils pievels germans sco planta da la vita. Enconuschent è er ch’ins decorava durant il temp medieval mailers en baselgia. Tge connex che quels usits han cun ils pignols da Nadal n'è dentant betg cler.
Chatsch dal 19avel tschientaner
La tradiziun da decorar per Nadal in pignol è pli giuvna ch’ins pudess pensar ed è vegnida il 19avel tschientaner da la Germania en Svizra. Alura han ins entschet a drizzar pignols en baselgias, chasas parochialas e scolas refurmadas. Ils catolics avevan l’entschatta anc fatg resistenza cunter la nova moda.
1 milliun pignols e dapli
Oz èn ils pignols ina part fixa da la festa da Nadal e da la commerzialisaziun da la festa. En Svizra vegnan vendids mintg’onn passa 1 milliun pignols. Bun la mesadad da quels vegn da l’exteriur. E prest tuts vegnan suenter las festas puspè dismess.
Ord l'archiv
Il 2017 ha RTR accumpagnà durant in di l'uffizi forestal da la vischnanca da Surses en il guaud.
In pignol sin temp
In pignol da Nadal - quel s’auda tar blers en stiva durant il temp da festa. Ma suenter quels dis èsi savens finì cun il pignol e quel vegn dismess. I dat dentant era l’opziun da prender a fit il pignol e suenter laschar crescher vinavant el. La via dal sem enfin ad il pignol ornà – il Minisguard declera.
RR actualitad 07:00