Il 2022 sa sviluppescha ad in veritabel onn da zeccas, sco quai che la «SonntagsZeitung» scriva. Fin l’entschatta da settember sajan passa 300 persunas s’infectadas cun FSME – in'inflammaziun da las paletschas dal tscharvè chaschunadas da morsas da zeccas.
Per cumparegliar: Avant diesch onns eran quai anc pli pauc che 100 persunas ad onn. L’expert da zeccas Norbert Satz è persvas che quest dumber fiss d’evitar sche la populaziun sa laschass vaccinar cunter zeccas. Dentant na saja en Svizra gnanc in terz da la populaziun vaccinada cumplettamain. Sco i pudess vesair or en il cas cuntrari mussia l’exempel da l’Austria. En il pajais vischn sajan bunamain 90% da la populaziun vaccinads cunter zeccas. En consequenza dettia quasi be pli turists da l’exteriur che s’infecteschian.