Siglir tar il cuntegn
Inhalt

Svizra «Plascha betg» – damain diever da social media en Svizra

In studi mussa: Las Svizras ed ils Svizzers han nizzegià damain las medias socialas l'onn 2017 – lur cifra è crudada per 4% sin 55%. Quai rapporta l’agentura da novitads svizra SDA sa basond sin in studi da la Publicom.

Polisch mussa vers giu.
Legenda: L'image da Facebook ha pati: Il concern american ha tenor il studi da la Publicom la pli bassa credibilitad da tuts. Keystone

Quai saja l’emprima giada ch’il diever da social media sa reducescha en Svizra, scriva la SDA. Da precisar è dentant, ch’il studi MediaBrands da la firma per medias e communicaziun Publicom vegn fatg pir dapi l’onn 2013.

Social Media pers dapli interess che las gasettas

Surprendenta è anc in’autra cifra: Tenor il studi hajan pers las medias socialas ( 2017: 59% / 2018: 55%) bler dapli utilisaders che la gasettas (2017: 95% / 2018:94%).

Las gasettas cuntanschian quests 94% da la populaziun svizra tranter 15 e 79 onns dentant betg be via print, ma er via la derasaziun digitala.

Problems dad image per las medias socialas

Las medias socialas hajan er da cumbatter cun lur image. Ils divers scandals pervi da maldiever da datas u fake news hajan fatg donn – quai en emprima lingia tar ils servetschs da Facebook e Twitter.

Facebook haja perfin la pli bassa credibilitad da tut las marcas da medias prendidas sut la marella per il studi, scriva la SDA.

Las Svizras ed ils Svizzers han fiduzia en lur medias

In’auta credibilitad attesteschan las Svizras ed ils Svizzers puspè a las medias publicas ed a las gasettas dal di regiunalas. Tut en tut restia la credibilitad da las medias en Svizra auta.

Cun il studi MediaBrands mesira la Publicom onn per onn la valur, che las Svizras ed ils Svizzers attribueschan a lur marcas da medias. Il studi actual è vegnì fatg tranter l’avrigl ed il matg 2018 tar 4’828 persunas tranter 15-79 onns che furman ina basa represchentativa. La quota da sbagl vegn inditgada cun +/- 1,4%, rapportescha la SDA.

RR novitads 15:00