La cumpart da plazzas anc betg occupadas è stada l'avrigl pli pitschna cumpareglià cun l'avrigl da l'onn passa vul dir 18 enstagl 32 pertschient, han communitgà la ETH Turitg e la plattafurma d'emprendissadis Yousty.
Mesiras da protecziun en ils manaschis d'emprendissadi, homeoffice e quarantina hajan dentant in effect negativ sin la qualitad da la scolaziun.
Fatg part da la retschertga han dapli che 2'500 manaschis d'emprendissadi cun 28'000 emprendistas ed emprendists.
Bleras plazzas èn occupadas
Concret èn l'avrigl 2021 82% da las plazzas d'emprendissadi stadas occupadas. L'avrigl 2020 èn quai anc stadas 68% da las plazzas. 76% dals manaschis han purschì tuttina u schizunt dapli plazzas ch'avant in onn, 21% vulan porscher pli paucas plazzas.
La maioritad dals emprendists e las emprendistas, vul dir 88%, lavuran normal, quai dentant cun las mesiras da protecziun dal Uffizi federal da sandad. Latiers tutgan cunzunt mesiras da distanza ed igiena. Radund in terz ha almain ina giada giu da far home-office.
