Rinforzar la confidenza – quai è il motto dal di dals malsauns da quest onn. I saja ina bella tradiziun che bleras persunas èn conscientas quest di per persunas ch’i na va betg uschè bain. Ch’ellas sa piglian il temp e visitan questas persunas malgrà il mintgadi rigurus. Quai ha ditg Viola Amherd, presidenta da la Confederaziun, en ses pled a chaschun dal di dals malsauns.
Noss patratgs èn il di dals malsauns spezialmain tar quels umans, dals quals igl è difficil da far attenziun.
Confidenza en temps turbulents
Flurs, in surrir, in discurs amicabel, tut questas chaussas dettian confidenza. I sajan ils pitschens gests che fan gia bler, quai ans fa mintg'onn endament. Pertge duvrain nus confidenza? Nus tuttas e tuts vegnin confruntads cun annunzias negativas, legiain ed udin tge che na va betg bain, tge che manca tut. Quai chaschunia dumondas, spezialmain tar umans ch'èn dependents dal provediment medicinal, tar lur confamigliaras e tar lur confamigliars u tar las persunas spezialisadas che lavuran en il sectur da sanadad. Or da problems pon dentant era adina sa sviluppar soluziuns, uschia vul Viola Amherd encuraschar. Per exempel dettia schanza per novas furmas da collavuraziun u tecnologias innovativas. Plinavant di la presidenta da la Confederaziun che tuts hajan plaz en ina cuminanza, ed i saja l'incumbensa da nus tuttas e tuts da far attenziun in per l'auter ed uschia d'intermediar confidenza.
