Interpresas che retiran per lur collavuraturs indemnisaziuns per lavur curta na duain betg dastgar pajar dividendas. Quai pretendan las cumissiuns socialas dal cussegl naziunal e dal cussegl dals chantuns. Quest scumond duai valair per quest e l'auter onn.
Enfin uss èn vegnidas tschentadas dumondas per indemnisaziuns da lavur curta per passa in terz dals emploiads en Svizra. Persuenter ha la confederaziun mess a disposiziun 6 milliardas francs.
Pront per ina segunda unda
Cun ina segunda moziun vul la cumissiun procurar che la Svizra è pronta per in'eventuala segunda unda da Covid-19. Persuenter duai la Confederaziun laschar intercurir las strategias da differents stadis per cumbatter la pandemia dal coronavirus. I duai vegnir intercurì, tge mesiras che hajan protegì il meglier la sanadad publica e chaschunà ils pli paucs donns economics e socials.
