La Posta Svizra ha distribuì damain brevs e damain pachets l’onn passà. Il dumber da brevs saja sa reducì per bunamain 6% sin 1,6 milliardas, cumpareglià cun l’onn avant. Uschia cuntinueschia il trend dals ultims onns, scriva la Posta. En ils davos 20 onns saja il dumber da brevs sa reducì per var 40%.
Il dumber da pachets saja sa reducì per bunamain 5% sin 185 milliuns. Quai saja tranter auter ina consequenza da la chareschia. Perquai emposta la glieud en general pli pauc. En general saja la «luna da consum» pli bassa, uschia la Posta.
Vinavant undas da pachets
Tuttina sa movia la quantitad da pachets vinavant sin in aut nivel, scriva la Posta Svizra vinavant. Oz distribuescha la Posta var 70% dapli pachets ch'avant diesch onns. Promovì quel svilup hajan surtut ch'i dat adina dapli purschidas d'empustar online. Plinavant aveva la pandemia da Covid-19 augmentà il dumber d'empustaziuns online.
Or da l'archiv
Ils pachets ch'arrivan en las chasadas Grischunas vegnan dapi intgins onns sortids a Vaz Sut. En general ha la Posta avert ils davos onns intgins centers da pachets en Svizra per vegnir a fin cun ils numerus pachets (e pachets returnads) da Zalando e co.
