Tenor il schef da concern Roberto Cirillo ha la populaziun in grond basegn, da survegnir mintga di posta. Ponderaziuns da mo pli distribuir la posta mintga segund di, e d’augmentar il pretsch per brevs – refusescha il schef da la Posta Svizra.
La qualitad da la spediziun saja ina da las raschuns, daco che la Posta saja sa sviluppada uschè positiv cumpareglià cun bleras autras societads da posta en l’exteriur – ha Roberto Cirillo manegià en in’intervista cun las gasettas da CH-Media. L’auta qualitad stoppia vegnir mantegnida.
Els na veglian betg sa midar en in museum. E quai saja mo pussaivel cun transfurmaziun, e betg cun reducziun. Cun lur nova strategia veglian els dar dapli paisa a la logistica. La logistica da brevs e da la posta ha il concern fusiunà l’entschatta 2021.
