En Grischun creschan las premias da las cassas da malsauns en media per 5,5%. Quai munta ch'igl è da pajar mintga mais 18,10 francs dapli il 2026. Enstagl da 332,6 francs al mais, sco fin uss, custan las premias en media l'auter onn 350,7 francs. Qua la survista da la midada dals custs a mais per l'onn 2026 tenor vegliadetgna:
- Persunas sur 26 onns: 400.80 francs (+5% ubain + 18,90 francs)
- Persunas tranter 19-25 onns: 282,70 francs (+8,2% ubain +21,50 francs)
- Uffants fin 18 onns: 108.40 francs (+5,3% ubain +5,40 francs)
Il minister da sanadad grischun, Rudolf Leuthold, na fetschia quest augment da las premias en Grischun betg smarvigliar – la cifra saja en ina dimensiun cun la quala ina haja quintà, sch'ins resguarda il svilup dals custs da la sanadad publica.
Situaziun en Svizra
L'onn 2026 vegn la premia en media a custar 393,30 francs a mais – quai munta in augment da 16,60 francs u 4,4%, cumpareglià cun l'onn 2025. La premia en Svizra crescha cunquai en media per pli pauc ch'ils ultims 2 onns, nua che l'augment era 6% e 8%. Tant pajan las persunas en Svizra il 2026 (en media pro mais):
- Persunas sur 26 onns: 465,30 francs (+4,1% ubain +18,50 francs)
- Persunas tranter 19-25 onns: 326,30 francs (+4,2% ubain +13,30 francs)
- Uffants fin 18 onns: 122,50 francs (+4,9% ubain +5,70 francs)
Midada da premias tenor chantun:
- Il pli ferm creschan las premias en il chantun Valleis. Là sto la populaziun pajar en media 20,8 francs (u 5,9%) dapli che l'onn avant.
- Sa legrar pon percunter ils abitants e las abitantas dal chantun Zug. Sco sulet chantun en Svizra sa sbassan là las premias numnadamain – en media pajan ils da Zug a partir dal 2026 pia 45,6 francs (u 14,7%) pli pauc che ussa. Cunquai è Zug da nov il chantun cun las pli bassas premias en Svizra (en media 264,50 francs). L'onn passà era quai anc l'Appenzell Innerrhoden (da nov 270,70 francs).
- Las pli autas premias pajan en media vinavant ils abitants e las abitantas dal chantun Tessin (da nov 501,5 francs). Lura suonda il chantun Genevra (489,8 francs) e Basilea-citad (470,10 francs).
Motivs per las premias pli autas
Las premias creschan directamein en consequenza dals custs da la sanadad publica adina pli fitg. Tenor la cumparegliaziun annuala èn ils custs da la sanadad publica creschì per 4,6% fin la fin da zercladur 2025. La Confederaziun numna en sia communicaziun quatter raschuns per quest nov augment da las premias da las cassas da malsauns:
- la populaziun che vegn pli veglia
- novas metodas da tractament
- in'adina pli gronda dumonda tar prestaziuns da sanadad
- tariffas pli autas, tant en il sectur ambulant sco era staziunar
A la conferenza da medias ha la ministra da la sanadad, Elisabeth Baume-Schneider, lura declerà ch'intginas da las raschuns per las premias pli autas sajan legraivlas, auteras problematicas. Legraivel saja che l'aspectativa da vita daventia adina meglra en Svizra – tranter auter era pervi da medicaments novs. Quai sajan tuts svilups ch'ins beneventia, ma quels fetschian era crescher ils custs da la sanadad publica.
Tscherts svilups en la sparta da sanadad beneventain nus, ma era quels procuran per custs pli auts.»
Il medem mument giaja la glieud er adina pli savens tar il medi u la media – ma era tar il terapeut u la terapeuta – che pli baud. «Quai stuain nus tegnair en egl», ha ditg Baume-Schneider. L'augment pertutgia gist pliras prestaziuns da sanadad, sco per exemepl ils custs d'ospital, custs per analisas da labor u psicoterapias.
Ma ins saja vinavant vi da discutar e d'elavurar schliaziuns per sbassar ils custs da sanadad, punctuescha la ministra da la sanadad. Sbassar ils custs na dastgia dentant betg ir sur tut – la qualitad da las purschidas da sanadad e la segirtad dals pazients e las pazientas sto vinavant pudair vegnir garantida.
