Siglir tar il cuntegn

Header

audio
Intervista cun Martin Candinas davart sias finamiras
Or da Novitads dals 28.11.2022.
laschar ir. Durada: 6 minutas 59 Secundas.
cuntegn

President Cussegl naziunal «Igl è noss pensum da far politica cun respect vicendaivel»

Martin Candinas è elegì sco president dal Cussegl naziunal ed è uschia il pli aut Svizzer per in onn. RTR accumpogna il politicher sursilvan durant quest di istoric.

Al cumenzament da la sessiun d'enviern elegia il Cussegl naziunal mintgamai il president u la presidenta da la Chombra gronda. Questa giada è quai Martin Candinas, il cusseglier naziunal da l'Allianza dal Center daventa uschia pli aut Svizzer. Elegì è el cun in resultat da 181 da total 188 vuschs. Candinas vegn uschia a seser il 2022/2023 sin la sutga presidiala e manar las tractativas dal cussegl ed era represchentar quel anoravers. Cun questa elecziun cuntanscha il Sursilvan ch'è dapi 11 onns en il parlament in punct culminant da sia carriera politica.

Martin Candinas

Avrir la box Serrar la box
  • dapi 2011 cusseglier naziunal da l'AdC/PCD
  • commember da la cumissiun per traffic e telecommunicaziun
  • commember da la cumissiun per la politica da segirezza
  • lavura sco spezialist da segiradas
  • ha 42 onns ed è bab da trais uffants

Ensemen

En ses emprim pled sco president novelegì ha el pledentà il parlament en tuttas quatter linguas naziunalas. El ha discurrì da l'impurtanza da la democrazia en temps uschè malsegirs sco oz, cun la guerra en Ucraina ed er malsegirezzas economicas en consequenza. El ha er accentuà l'impurtanza da la debatta sco tala e ch'i valia d'emprender d'acceptar las opiniuns d'auters per pudair collavurar ensemen empè dad ir vias parallelas in dasper l'auter u perfin in encunter l'auter.

video
Il Telesguard ha accumpagnà Martin Candinas durant il di
Or da Telesguard dals 28.11.2022.
laschar ir. Durada: 2 minutas 52 Secundas.

Candinas ha er menziunà ch'el vegnia a laschar reparter damaun in pitschen vocabulari per che las sessiuns possian en avegnir er vegnir manadas, almain per part, per rumantsch.

Famiglia e collegas da la politica s'allegran

audio
Famiglia ed er collegas da la politica han plaschair per Martin Candinas
ord Novitads dals 28.11.2022.
laschar ir. Durada: 2 minutas 36 Secundas.

Divers collegas da la politica a Berna e dal Grischun s'allegran da quest onn cun Martin Candinas sco president dal Cussegl naziunal. Er la famiglia ha plaschair da sia elecziun. Da l'apero suenter l'avertura da la sessiun han tuts fatg in viva sin Martin Candinas.

video
Collegas dal Cussegl naziunal fan cumpliments a Candinas
Or da Telesguard dals 28.11.2022.
laschar ir. Durada: 2 minutas 22 Secundas.

Mesemna ha lieu a Mustér l'act festiv per l'elecziun da Martin Candinas sco president dal Cussegl naziunal. A las 14:00 avess Candinas dad arrivar a Mustér sin staziun. Lura datti in cortegi fin en claustra, nua che las festivitads han lura lieu.

Il sisavel Grischun che daventa pli aut Svizzer

Avant Martin Candinas èn anc tschintg auters politichers grischuns stads a la testa dal Parlament federal:

  • Andreas Rudolf von Planta: 1865/66
  • Andrea Bezzola: 1885/86
  • Alfred von Planta: 1913/14
  • Giusep Condrau: 1956/57
  • Martin Bundi: 1985/86

Per festivar Martin Candinas en ses nov uffizi datti diversas festas. Uschia datti mesemna a Mustér in act festiv cun til e participaziun da prominenza sco era da la populaziun. La sonda lura suonda la festa a Rabius, ch'è la patria da Martin Candinas.

RTR dat in sguard enavos sin las entschattas politicas da Martin Candinas e sin sia carriera:

video
Intginas perlas d'archiv or da la carriera da Martin Candinas
Or da Telesguard dals 28.11.2022.
laschar ir. Durada: 2 minutas 13 Secundas.

RTR actualitad 07:00

Artitgels legids il pli savens

Scrollar a sanestra Scrollar a dretga