L'anteriura cussegliera dals chantuns Lisa Mazzone candidescha per il presidi da la Partida verda. Ed ella resta la suletta candidata. Enfin ier saira n'ha nagin auter annunzia sia candidatura. Quai ha communitgà la partida.
Mazzone aveva annunzià avant bun duas emnas da candidar suletta per il presidi. Suenter lungas ponderaziuns haja ella realisà ch'il post interesseschia ella, e ch'i saja l'endretg lieu per nizzegiar sias cumpetenzas, uschia Mazzone. Ella candideschia persula, in co-presidi na veglia ella betg.
Glättli aveva decis da demissiunar sco president dals verds suenter che la partida aveva pers plirs sezs tar las elecziuns parlamentaras l'atun passà.
L'atun passà ha la politicra manchentà la reelecziun en il Cussegl dals chantuns. Davos Mauro Poggia dal MCG e Carlo Sommaruga da la PS ha ella be fatg il terz meglier resultat, en il segund scrutini.
Bleras autras persunalitads dals Verds han desistì d'ina candidatura. Tranter quels la scheffa da fracziun, Aline Trede, la cussegliera naziunala dal Tessin Greta Gysin e Gerhard Andrey, ch'ha candidà per il Cussegl federal.
