L’emprim di s’occupa il Cussegl naziunal dal preventiv da l’armada. La cumissiun per la politica da segirezza ch'il Cussegl naziunal propona cun ina moziun d’augmentar fin l’onn 2030 las expensas per l’armada pass per pass sin circa set milliardas francs. Fin il pli tard l’onn 2030 vul la cumissiun dar or 1% dal product interiur brut per l’armada.
Il motiv per la pretaisa è la guerra en l'Ucraina. Gia en la sessiun da primavaira avevan las fracziuns burgaisas da tuttas duas chombras pretendì d’augmentar pass per pass il preventiv dal departament da defensiun. La cumissiun per la politica da segirezza dal Cussegl dals chantuns fa la medema pretensiun, medemamain cun ina moziun.
Il Cussegl federal va d’accord cun la finamira e propona in Gea a las moziuns. El na vul dentant betg sa fixar sin summas concretas, mabain giuditgar cuntinuadamain las expensas supplementaras «en la glisch da las expensas totalas».
Procedura civila
Il segund di da la sessiun tracta il Cussegl naziunal alura la procedura civila modernisada. Qua dastgass in «artitgel da medias» chaschunar discussiuns: Il Cussegl dals chantuns ch'aveva tractà il project sco emprim cussegl, ha sbassà l'obstachel per disposiziuns superprovisoricas ch’èn vegnidas acquiridas da la dretgira per franar preventivamain rapports da medias.
Oz po ina dretgira fermar in rapport, sche quel po chaschunar in dischavantatg spezialmain grev per la partida petenta. Il Cussegl dals chantuns ha stritgà il pled «spezialmain». Uschia tanscha – ultra d’auters criteris – in «grev dischavantatg» sco giustificaziun per impedir ch’il rapport da medias vegnia impedì provisoricamain.
La maioritad da la cumissiun da dretg dal Cussegl naziunal vul far il medem sco il Cussegl dals chantuns. I dat dentant er propostas da minoritad – ina minoritad vul restar tar il status quo.
Cun la refurma da la procedura civila duain privats ed interpresas survegnir in access pli facil a las dretgiras. Tranter auter duai il dretg dals custs da process vegnir adattà. Il Cussegl federal ha desistì da meglierar la giurisdicziun collectiva suenter la consultaziun.
Taglia sin la plivalur pli bassa per tampons
En la sessiun extraordinaria s’occupa il Cussegl naziunal la finala er d’adattaziuns en la lescha davart la taglia sin la plivalur. Tranter auter duain ils commerziants online che vendan rauba en Svizra vegnir suttamess a la taglia sin la plivalur. Las plattafurmas da la Svizra èn gia suttamessas a la taglia sin la plivalur.
La cumissiun d’economia dal Cussegl naziunal predeliberanta vul extender questa regla sin tut las importadras ed ils importaders ch’èn obligads da pajar taglia. Uschia duai vegnir garantì ch’interpresas d’import indigenas na vegnian betg dischavantagiadas envers plattafurmas electronicas da l’exteriur.
La cumissiun è d’accord cun la taxaziun pli bassa dals products per l’igiena mensila. Propostas per stritgar questa disposiziun, sco er per extender la reducziun da taglia sin ils pez da pops e sin products igienics da persunas incontinentas èn dentant stgars vegnidas refusadas en la cumissiun.
In auter tema da la sessiun extraordinaria è la dumonda cura ch'ina persuna è svizra. Oz dependa bler da la derivanza dals geniturs. I dat era la pussaivladad da la natiralisaziun. Ina moziun vul ussa dentant promover l’idea che mintga persuna che nascha e viva en Svizra po dumandar il pass svizzer cura ch’ella daventa 18 onns veglia. Gia en la cumissiun n’ha questa proposta betg chattà bler sustegn.
