En pliras citads svizras èn persunas idas sin via per demonstrar en connex cun il di da la lavur. A Turitg hai dà donns materials, graffitis, tartignims cun colur ed ina vitrina donnegiada – latiers ina demonstraziun nunlubida. Ina gruppaziun d'autonoms da la sanestra ha la polizia stuì tschinclar. Ella ha fatg controllas da persunas. Graffitis e tartignims cun colur haja era dà a Basilea. Uschiglio sajan las demonstraziuns stadas paschaivlas.
Pleds d'admoniziun
Mo ina faira societad saja ina ferma societad. Quai ha la cussegliera federala Elisabeth Baume-Schneider ditg a ses pled dal prim da matg a Thun. Ella ha avertì d'ingiustia sociala. Pajas bassas ed ina mancanza da segirtad sociala sajan la basa per gritta e polarisaziun.
A Bienna ha il president da l'Uniun sindicala svizra, Pierre-Yves Maillard crititgà las absolut falladas cifras d'inflaziun. Las premias da las cassas da malsauns sajan sclaussas da la calculaziun, quai ch'haja per consequenza che la vaira inflaziun vegnia sutvalitada totalmain.
In pau pli turbulent èsi stà en la Tirchia. Ad Istanbul hai dà confruntaziuns tranter demonstrants e la polizia. Lezza ha duvrà gas lacrimogen per impedir in marsch da protesta envers la Plazza Taksim. Tenor il minister da l'intern tirc sajan passa 200 persunas vegnidas arrestadas. Perquai che las autoritads han gì dubis areguard la segirtad per la Plazza Taksim en il center dad Istanbul, avevan ellas relaschà in scumond da demonstrar là.