Tgi che n’è betg vaccinà cunter il coronavirus e sto ir en l’ospital pervi da Covid duai pajar sez ina part dals custs. Ina discussiun davart quel tema vul il professur d’economia Marius Brülhart animar. El propona ina assicuranza supplementara che surpigliass ils custs da l’ospital.
Il ristg che persunas betg vaccinadas stoppian ir en l’ospital saja pli grond, quai saja in fatg. Ed il professur d’economia agiunta ch’i custia tranter 25'000 e 30'000 francs per tractar in tal pazient u pazienta. L’idea d’ina assicuranza supplementara per Covid cumpareglia el cun il principi ch’i dat gia tar assicuranzas d’accidents.
Pauc entusiassem en la politica da sanadad
L'idea na chatta betg buna accoglientscha tar politicras da sanadad. Cusseglier dals chantuns Thomas de Courtern argumentescha cunter quest'idea cun il dretg per mintga burgaisa e burgais en Svizra haja il dretg constituziunal sin provediment da la sanadad adequat. Sumegliant vesa quai la cussegliera naziunala Barbara Gysi: Ins stoppia persvader la glieud da sa laschar vaccinar, betg crear novas assicuranzas. Questa priorisaziun beneventa er l'econom Marius Brülhart.
