Curt e concis:
- Il trend d'infecziuns novas giaja ensi. Il mument hajan var 2% dals tests fatgs in resultat positiv.
- A partir da glindesdi, ils 20 da fanadur, avran puspè ils cunfins cun intgins pajais. Tranter quels èn per exempel l'Irlanda, Croazia, Cipra e Romania.
- La glista cun pajais da ristg vegn surlavurà. Ins stoppia quintar ch'ina dunsaina da pajais vegnan nov sin la glista. Tgenins n'è anc betg cler.
Situaziun actuala
Dapi la gievgia hajan ins fatg var 7'000 tests, 92 sajan stads positivs. Il mument sajan 630 persunas en isolaziun, 2'300 persunas sajan en quarantina. Var 10% dals cas positivs sajan «cas importads» – pia persunas ch'èn vegnidas en da l'ester. Durant ils ultims set dis sajan 20 persunas supplementaras vegnidas ospitalisadas.
«Privlus stabil»: Uschia descriva Patrick Mathys, il manader da la secziun per superaziun da la crisa da l'Uffizi federal da sanadad, la situaziun. Il trend d'infecziuns novas giaja ensi. Il mument sajan var 2% dals tests fatgs positivs. Vinavant hajan ins vis, quant spert ch'il dumber dad infecziuns novas possia crescher.
Novas averturas e novs pajais da ristg
A partir da glindesdi, ils 20 da fanadur, èsi puspè pussibel d'arrivar en Svizra da l'Irlanda, Croazia, Cipra e Romania sco er d'intgins pajais pitschens. Vinavant saja pussibel da vegnir en da l'Australia, Giapun, Canada, Maroc e Corea dal Sid.
Adina dapli persunas fetschian viadis e giajan en vacanzas, han constatà ils experts. Perquai ha il Cussegl federal avant var duas emnas decidì intgins pajais da ristg. Quella glista cumpiglia il mument 29 pajais. Il mument vegnia questa glista surlavurada.
Ins sto quintar ch'ina dunsaina da pajais vegnan tiers.
Tgenins n'ha el dentant betg vulì dir, avant ch'il decret n'entra betg en vigur. Quai vegnia probablamain ad esser proxima mesemna.
Per ch'il Cussegl federal declera in pajais sco pajais da ristg dettia trais criteris:
- Sch'i dà en il pajais entaifer 14 dis dapli che 60 cas positivs sin 100'00 persunas. La Svizra ha actualmain ina quota da circa 15 cas.
- Sch'il pajais na dat betg avunda datas ed infurmaziuns per valitar la situaziun.
- Sche pliras persunas infectadas èn vegnidas da quest pajais en Svizra.
Controllas da quarantina
Per controllar, sche las persunas che turnan d'in pajais da ristg van en quarantina, fetschian ins controllas punctualas. L'Uffizi federal da statistica pretendia per exempel da las societads aviaticas las glistas da passagiers e las datas da contact. Las controllas fetschian lura ils chantuns, cun sustegn dal BAG.
Controllar tut las persunas na saja dentant betg pussibel. Quai sajan memia bleras persunas.
Chastids da 10'000 francs
Il chantun Turitg dat chastis da 10'000 francs per persunas che na resguardan betg las reglas da quarantina. Sco che Patrick Mathys ha precisà: questa practica vala per tut il pajais.