Il parlament decida ils 25 da settember sche Lauber vegn reelegì u betg. La cumissiun da la dretgira cusseglia cun 9 cunter 6 vuschs, da betg pli eleger Lauber. Ina raschun per la decisiun saja la relaziun disturbada tranter la procura publica federala e l'autoritad da surveglianza.
Procura publica n'haja betg dà giu documents
Quella autoritad ha cumenzà il matg cun ina procedura disciplinara cunter Lauber. Raschun èn ils inscunters informals cun il schef da la FIFA, Gianni Infantino. En ina communicaziun tar il rapport ha l'autoritad declerà ch'ella na possia betg manar tras la procedura senza la collavuraziun da Lauber. Sin dumonda da l'agentura da novitads Keystone-SDA haja l'autoritad confermà ch'els n'hajan betg survegnì documents ch'els avevan dumandà da Lauber. Plinavant haja el scumandà a duas persunas da s'exprimer en in'interrogaziun.
Dretg sin ina procedura faira
Lauber da ses maun aveva crititgà l'autoritad. Cun la procedura penala na saja ella betg sa tegnida vi da las prescripziuns da la lescha. Dapi tschintg mais vegnia refusà ad el il dretg d'udida giuridica. Er el sco procuratur public general haja il dretg sin in process fair.
Davart las renfatschas dad uss na vul la procura publica federala betg s'exprimer. Ella renviescha a la posiziun che Lauber haja piglià en il rapport da la cumissiun da dretgira.
RR novitads 16:00
