Sco stà annunzià, èn trais anteriurs funcziunaris da la Federaziun tudestga da ballape restads a chasa enstagl da sa preschentar avant dretgira. I sa tracta dals anteriurs presidents Theo Zwanziger (74) e Wolfgang Niersbach (69) e da l’anteriur secretari general Horst R. Schmidt (78).
Sulet in accusà cumpara
Els han argumentà cun problems da sanadad e la tema dal coronavirus. La derschadra n’ha dentant betg acceptà ils attests dal medi. Tenor ella avessan ils umens pudì laschar examinar lur sanadad en l’ospital chantunal a Bellinzona. Sco sulet sa preschentà avant dretgira è l’anteriur secretari general da la FIFA, il Svizzer Urs Linsi (70). Sch'ils ulteriurs accusads mancan era la mesemna, lura cuntinuescha il process senza els.
Squitsch da temp
Cun spustar il process crescha il squitsch sin la giustia, il termin d'annaziun vegn pli e pli datiers. Fin ils 27 d'avrigl sto ina sentenzia da l'emprima instanza esser sin maisa per evitar in'annaziun.
La Procura publica federala aveva avert la procedura ils 6 da november 2015. Ella renfatscha a Niersbach, Zwanziger, Schmidt e Linsi – d'avair zuppentà la vaira raschun per in pajament l'onn 2005 en l'autezza da 6,7 milliuns francs da la Federaziun tudestga da ballape a la Federaziun mundiala FIFA. Ils accusads han adina refusà la renfatscha.
RTR novitads 15:00