En Svizra èsi vegnì producì 101 milliuns liters vin l’onn passà. Cumpareglià cun l'onn avant saja quai in plus da radund dus milliuns liters. Cumpareglià cun la media dals ultims 10 onns saja quai in plus dad 11 milliuns liters. Quai ha communitgà l’Uffizi federal d’agricultura.
Las autas temperaturas e la pauca plievgia da l'onn passà hajan gì in effect positiv sin la viticultura. Il cuntegn da zutger saja stà pli aut ch'en media durant madirar. Quai empermettia ina annada excellenta, scriva l'Uffizi federal d'agricultura vinavant. Era per il cumbat cunter malsognas saja l'aura stada buna.
Il pli bler vin vegn da la Svizra franzosa
En la Svizra franzosa è vegnì producì en total 79,5 milliuns liters vin, quai è in augment da bunamain 1,5%. En la Svizra tudestga èn quai stads 16,5 milliuns liters ed uschia bunamain 4% dapli che l'onn passà. En la Svizra taliana (Tessin e Mesauc) è vegnì producì en total 4,9 milliuns liters, quai che correspunda ad in lev minus dad 1%.
Grischun è stà pertutgà da granella
Vers la fin da fanadur ha granella localmain chaschunà gronds donns. Sco il Plantahof aveva communitgà il november han ins perquai racoltà 10% pli pauc ivas en il Grischun, cumpareglià cun l'onn avant.
Or da l'archiv:
En il Signuradi datti viticulturs che racoltan las ivas cun agid d'ina maschina e betg pli a maun: