Suenter ina buna stagiun da stad pudess il turissem en Svizra er salvar ses schlantsch l’enviern. Il dumber da pernottaziuns vegnia a s’augmentar per 16% sin stgars 17 milliuns, prognostitgescha l'Institut per la perscrutaziun da la conjunctura KOF. La dumonda saja s’augmenta spertamain dapi il favrer, cura che las restricziuns da corona sajan vegnidas abolidas pass per pass. Durant la stad haja il dumber da pernottaziun puspè cuntanschì il nivel dal 2019, pia d’avant la pandemia. Il trend da far vacanzas en la patria cuntinueschia. En bleras regiuns turisticas sajan er puspè ils giasts da l’exteriur turnads, surtut dals Stadis Unids. Il dumber da giasts da l'exteriur resta dentant sut il nivel d'avant la pandemia da corona.
Per l'enviern haja la Svizra l'avantatg ch'ils pretschs sajan pli stabils ch'en auters pajais. La Svizra saja main dependenta da ressursas russas, uschia il KOF. Il franc svizzer fitg ferm vegnia dentant ad avair in effect negativ sin il dumber da pernottaziuns.
Gronds quitads en l'hotellaria
Latiers vegnan ils pretschs d'energia. Dapli pernottaziuns na vul perquai betg dir che l'hotellaria è optimistica per l'enviern. Tenor ina retschertga da Hotelleriesuisse muntan ils pretschs per hotels en media per 129%, mintga segund manaschi vegnia ad esser en difficultads finanzialas. Tenor ina retschertga cun 112 manaschis d'hotellaria grischuns, han 30% ditg, ch'els teman problems existenzials.
Il president da Hotelleriesuisse Andreas Züllig quinta che blers hotels vegnan a declerar il concurs quest enviern. Las marschas vegnian adina pli pitschnas pervi dal custs che creschan, spezialmain per hotels che dovran bler energia – per exempel per implants da wellness, ha deplorà il directur da l'Hotel Adula a Flem Paul Urchs en la Sonntagszeitung.
In ulteriura malsegirezza è il svilup da la pandemia, restricziuns vessan puspè ina influenza negativa sin la las pernottaziuns. Il KOF na fa dentant betg quint en sia prognosa cun ulteriuras restricziuns quest enviern. Per l'hotelleria para el dentant da vegnir intschert er senza la pandemia.
