Oz èsi uschia che la Confederaziun sustegn la pressa svizra cun reducir ils custs da la spediziun matutina da tschertas gasettas. Plinavant survegn ina part dals emetturs privats da radio e televisiuns in sustegn finanzial or da la SERAFE, la taxas da radio e televisiun.
Sustegn independent da la furma da distribuziun
Il diever da medias saja dentant sa midà ils davos decennis, scriva la Cumissiun federala da medias en ses rapport per mauns dal Cussegl federal. Per sustegnair in’infurmaziun vasta ed independenta da la populaziun stoppian perquai tuttas medias privatas pudair profitar dad in sustegn, independent sche las infurmaziuns vegnan stampadas, emessas u publitgadas online, u sch'i sa tracta da text, tun u video.
Quest sustegn possia per exempel succeder cun sustegnair pli ferm la scolaziun e furmaziun u cun porscher a projects publicistics novs ed innovativs in sustegn finanzial da partenza, scriva la cumissiun.
Vinavant fitg impurtant restia dentant da garantir che la promoziun da las medias succedia a moda independenta, senza che la politica u gruppas d'interess possian influenzar tgi che survegnia sustegn e tgi betg, accentuescha la Cumissiun federala da medias.
