Emploiadas ed emploiads duain en avegnir pudair trair giu ils custs professiunals a moda pauschala. Il Cussegl federal ha deliberà ina proposta per la lescha en consultaziun. Uschia duain ils emploiads decider sez sch'els veglian trair giu lur custs professiunals pauschal u effectiv e cunzunt na duai uschia vegnir fatg nagina differenza pli tranter homeoffice e la lavur en l'interpresa. Quant auta che la pauschala vegn ad esser vegn il departement da finanzas a decider.
Deducziun dals custs effectivs resta
Empè da la pauschala pon er vegnir deducids ils custs effectivs. Da nov pon ils custs per la lavur mobila er vegnir deducids sche l'emploiader metta a disposiziun ina plazza da lavur.
Sco part dals custs effectivs ch'ins po deducir restan oravant tut ils custs da viadi sco er ils custs supplementars per l’alimentaziun ordaifer e per la dimora durant l'emna. Per ils custs da viadi vala tar la taglia federala directa sco fin ussa in maximum, a partir l'auter onn 3'200 francs.
La pauschala na duai avair nagina consequenza finanziala sin la Confederaziun. Ins quinta perquai cun ina dimensiun da 6000 francs. Questa pauschala duai er valair per la taglia chantunala, quant auta che lezza vegn ad esser pon ils chantuns decider sez. La consultaziun cuzza fin ils 4 d’avrigl 2023.
