Siglir tar il cuntegn

Header

cuntegn

Proprietad d'abitar Immobiglias èn vegnidas pli charas

Tgi ch'ha vulì cumprar ina chasa l'onn passà en Svizra ha stuì ora cun la bursa gronda. Ils pretschs èn creschids en bunamain tut las regiuns da la Svizra tudestga ed en il Tessin. Quai vala cunzunt per chasas d'ina famiglia.

En media èn chasas d'ina famiglia vegnidas 3,6% pli charas l'onn passa, cumpareglià cun l'onn avant. Quai mussa in'analisa fatga per incumbensa dal portal d'immobiglias Newhome. Per cumparegliar: La chareschia generala era tar 2,1% l'onn 2023.

Er las cifras da l'Uffizi federal da statistica mussa in medem maletg. Guardà sur l'entir onn èn ils pretschs per immobiglias creschids per 2,2% cumpareglià cun l'onn avant. L'uffizi sa basa sin autras indicaziuns, perquai varieschan las cifras en congual cun Newhome.

Grond augment en il Tessin e Svizra Orientala

Il pli fitg èn ils pretschs creschids en la Svizra Orientala ed en il Tessin. Quai haja cunzunt era da far cun il fatg che questas regiuns hajan gì da prender suenter cumpareglià cun autras regiuns. Ultra da quai saja la finanziaziun d'ina chasa d'ina famiglia en questas regiuns anc adina pli simpla ch'insanua auter. Cumpareglià cun chasas en autras regiuns svizras custia ina chasa d'ina famiglia numnadamain pli pauc en la Svizra Orientala ed en il Tessin, uschia Newhome.

Las pli charas chasas en Svizra Centrala

Da las sis regiuns ch'il portal d'immobiglias ha laschà examinar custa ina chasa d'ina famiglia il pli bler en la Svizra Centrala. En media ha ina tala custà là passa 1,6 milliuns francs. Quai èn bun 5% dapli che l'onn avant. Sin plazza dus è la regiun Turitg cun passa 1,5 milliuns francs. Pli favuraivlas èn chasas d'ina famiglia be vegnidas en ils chantuns Berna e Soloturn. En media ha ina chasa d'ina famiglia custà en lezzas regiuns 920'000 francs.

Ils pretschs per abitaziuns da proprietad èn entant s'augmentads main che quels per chasas da proprietad l'onn passà. Concret per be 0,4%. Il pli fitg èn quests pretschs creschids en la regiun Turitg. En media ha ina abitaziun da proprietad custà là 1,8% dapli che l'onn 2022. Tgi ch'ha vulì sa prestar ina abitaziun da proprietad en questa regiun ha stuì prender enta maun en media 1,08 milliuns francs.

audio
Per tadlar: las novitads da las 10:00
ord RTR Audio dals 29.01.2024.
laschar ir. Durada: 2 minutas 25 Secundas.

RTR novitads 10:00

Artitgels legids il pli savens