- Il Cussegl federal ha deliberà la missiva tar la revisiun da la lescha d'epidemias.
- Per l'elavuraziun da quel ha il Cussegl federal er tratg conclusiuns or da la pandemia da Covid-19.
- Trais stgalims d'escalaziun: normal, spezial, extraordinari.
Cumpetenzas pli cleras dals chantuns e Confederaziun, meglierar la surveglianza ed il provediment cun urden medicinal, basa legala per eventuals agids economics: Cun quests ed ulteriurs instruments vul il Cussegl federal preparar la Svizra per pandemias futuras.
Il project duai meglierar il cumportament cun crisas da sanadad, ha scrit il Cussegl federal. En quest connex pensia el vi dad epidemias e pandemias, ma er vi da tractar adina dapli las resistenzas d'antibiotica. Il proxim pass sto far il parlament.
Tenor il Cussegl federal vegn cun la refurma sclerì en spezial la repartiziun da las cumpetenzas sin tut ils livels statals. La pandemia da Covid-19 haja mussà ch'i dovria adattaziuns per meglierar la prevenziun e per en avegnir dumagnar privels da la sanadad publica.
Repartir pli cler las cumpetenzas
Las adattaziuns dal model d'escalaziun cumpiglian trais stgalims: situaziun normala, speziala ed extraordinaria. En la situaziun normala survegn il Cussegl federal la cumpetenza d'ordinar mesiras en il traffic public, sco per exempel in'obligaziun da purtar mascrinas, quai en cas d'ina periclitaziun speziala.
La situaziun speziala declera la regenza naziunala suenter avair consultà ils chantuns e las cumissiuns parlamentaras correspundentas. En questa fasa prenda la regenza las decisiuns necessarias davart la strategia e l'organisaziun per cumbatter il privel. Entant duain ils chantuns restar responsabels per ordinar restricziuns, sco per exempel il scumond d'occurrenzas.
Sin il stgalim il pli aut – la situaziun extraordinaria – po il Cussegl federal prender mesiras tenor dretg d'urgenza. Ultra da quai vegnan tant la Confederaziun sco er ils chantuns obligads da sa preparar per situaziuns d'urgenza per la sanadad, per exempel cun sviluppar plans da crisa sco il plan naziunal da pandemia.
Vaccinar sco fin uss
Il nov project prevesa ch'ils chantuns ston facilitar l'access a vaccinaziuns, en spezial en las apotecas. L'obligatori da sa laschar vaccinar resta il medem, ed era en il futur n'èsi betg pussaivel da vaccinar ina persuna senza il consentiment da quella.
Plinavant survegn il Cussegl federal la cumpetenza da producir sez rauba medicinala impurtanta, sch'ils chantuns u purschiders privats n'èn betg capabels da far quai. Quai cumpiglia vaccins, mascrinas da protecziun respiratorica, squittas sco er equipament da protecziun. La Confederaziun duai er esser bun da surpigliar ils custs per vaccins, per tests e per medicaments en cas da pandemias futuras.
Sche las mesiras reduceschan considerablamain la svieuta d' interpresas e sch' i smanatschan ina greva recessiun da l'economia generala, po il Cussegl federal metter a disposiziun agids finanzials restituibels per sustegnair las interpresas pertutgadas.
Or da l'archiv – la cronologia da la pandemia