Il concern d’armaziun Ruag ha vulì furnir muniziun a la polizia da Hongkong – ma la Confederaziun ha franà questa fatschenta. Quai demussan retschertgas dal «Sonntagsblick».
Per tgei vai?
Avrir la boxSerrar la box
L'anteriura colonia da la Gronda Britannia tutga dapi il 1997 tar la China. Enfin il 2047 duessan ils abitants avair dretgs spezials sco la libertad da pressa u la libertad d'opiniun. Ils demonstrants renfatschan a la scheffa da regenza, Carrie Lam, dad restrenscher quels dretgs sin squitsch da la regenza da la China. Ils protests han cumenzà la stad 2019.
Il risico che la muniziun pudess vegnir duvrada cunter civilists en la Regiun d’administraziun speziala Hongkong saja memia gronda, ha concludì ina gruppa da controlla da la Confederaziun ensemen cun represchentants da plirs departaments il matg da l’onn passà. La furniziun periclitass la pasch e la stabilitad en la regiun.
Tant la Ruag sco er il Secretariat da stadi per l’economia (SECO) han confermà quest scumond envers la gasetta da la dumengia.
