Siglir tar il cuntegn

Header

cuntegn

Radunanza da delegads La PLD daventa pli verda

  • La basa da la partida da la PLD sustegna lur presidenta Petra Gössi.
  • Ils delegads da la Partida liberaldemocratica han a chaschun da la radunanza da delegas s'exprimì da suandar las miras da la cunvegna dal clima da Paris e da reducir las emissiuns cun effect da serra fin l'onn 2050 sin null.
  • Plinavant han els decidì d'acceptar la pretensiun d'ina taxa sin CO2 per bigliets da sgol. Uschia suondia la partida ina pretensiun da la basa, han argumentà ils aderents.

En tut han ils delegads tractà passa 50 propostas. Las bleras n'han però gì nagina schanza.

«Ambient è ina chaussa dal cor»

Per Petra Gössi saja la politica d'ambient daventada ina chaussa dal cor, ma ina chaussa dal cor cun signatura liberala. Ils delegads e las delegadas hajan uss la pussaivladad da purtar en lur posiziuns individualas en il palpiri da posiziun «Politica d'ambient e da clima liberala: Schliaziuns liberalas datiers a l'uman». Suenter spetgia ella dentant er da tuttas e da tuts che las decisiuns vegnian acceptadas e respectadas e che la partida possia passar si a moda unida.

Agir ord persvasiun

Tenor Gössi saja la politica d'ambient lura il meglier cura che las persunas involvidas ageschian or da persvasiun endretg. Per pudair surpigliar la responsabladad per lur far dovrian ellas dentant infurmaziuns davart consequenzas e custs. Mo tgi ch'enconuschia ils custs possia er agir en atgna responsabladad, ha ditg la presidenta da la partida.

Stimuls e transparenza empè da scumonds

I dovria mesiras per diriger che sa basan sin il principi dal chaschunader. I dovria mecanissems per stimular. Uschiglio dettia il ristg ch'i vegnia baud u tard regì cun scumonds e quai fiss cuntraproductiv per l'innovaziun ed il svilup da la tecnologia.

RR novitads 12:00++

Artitgels legids il pli savens