Siglir tar il cuntegn

Header

cuntegn

Rait da la Swisscom Bakom vul scleriment pervi da disturbis

La Swisscom è obligada da garantir l’access als numers d’urgenza. Suenter il segund incap entaifer in mais ha l’Uffizi federal da communicaziun BAKOM uss annunzià, ch’ins vegnia a sclerir da radent ils fatgs.

Il Bakom na possedia en il mument anc betg in’analisa dals sbagls – ord quest motiv na possian ins anc betg far indicaziuns concretas. Sche l’uffizi constatescha violaziuns da la lescha po el pretender da la Swisscom mesiras ed adattar, limitar u schizunt retrair las concessiuns a la Swisscom.

Disturbis pervi da lavurs da mantegniment

En vastas parts da la Svizra hai dà il mardi saira tard problems cun la rait da telefon. Plirs chantuns han annunzià ch'era ils numers d'urgenza sajan crudads ora. Polizia e sanitad èn stadas cuntanschiblas mo sur la rait mobila.

Tenor la Swisscom eran planisadas lavurs da mantegniment. Quellas hajan gì per consequenza in «cumportament sbaglià nunspetgà». Silsuenter haja la Swisscom annullà las lavurs da mantegniment e da l'ina la notg haja tut puspè funcziunà. En il decurs dal di vul l'interpresa communitgar ulteriurs detagls.

Panna da telefonia gia il schaner

Gia il schaner ha la rait fixa da telefonia gì disturbis en bunamain tut ils chantuns. Suenter passa in'ura han ins pudì schliar il problem. La raschun per la panna era in problem tecnic da la rait.

RTR novitads 06:00

Dapli da Svizraavrir la Landingpage

Nach links scrollen Nach rechts scrollen