Siglir tar il cuntegn

Header

cuntegn

Rait da transmissiun Sbagl en la lescha da solar pudess far problems

Sin fundament da la crisa d'energia aveva il parlament decis «express» ina lescha da solar l'atun passà. Quella simplifitgesch las proceduras da permissiun per implants solars. Provediders d'electricitad fan ussa però attent sin in sbagl che pudess far in stritg tras il quint.

La finamira da la lescha è da construir fin il 2025 indrizs solars che produceschan dapli che 3% da l'entira producziun d'electricitad da la Svizra. Tenor l'Uffizi federal da statistica avess quai da dar enturn 200 indrizs da solar en regiuns alpinas. Dentant haja la lescha in grond sbagl. Quai ha Michael Frank, il mainafatschenta da l'associaziun dals provedider d'electricitad ditg envers la «Sonntagszeitung». Sch'ins construeschia indrizs solars en regiuns alpinas, stoppian ins era engrondir la rait da transmissiun. E quai haja il parlament emblidà da resguardar. Ina lubientscha per engrondir la rait da transmissiun cuzzia numnadamain almain 6, per part dentant er 10 fin 15 onns. Uschia vegnian bleras regiuns adattadas, sco per exempel il Vallais, gnanc en dumonda per construir novs indrizs. Là è la rait da transmissiun gia chargià talmain, ch'i dovra novas lingias sche novas ovras solaras vegnan vitiers. Tenor il pledader da Swissgrid vesi ora sumegliant en auters chantuns.

Po la politica anc curreger il sbagl?

Il parlament pudess schliar il problem, cun simplifitgar las lubientschas per engrondir la rait da transmissiun – cun ina nova lescha. Ina tala lescha è gia en preparaziun, i n'è dentant betg cler sche quella vegn ad uras, perquai che divers politichers e politicras èn encunter scursanir il process per engrondir la rait. Il cusseglier dals chantuns Beat Rieder, dal Vallais, è dentant da l'avis, ch'i vegnia a funcziunar.

audio
Per tadlar: curt e cumpact
ord RTR Audio dals 26.03.2023.
laschar ir. Durada: 1 minuta 17 Secundas.

RTR novitads 12:00

Artitgels legids il pli savens