Bun la mesadad da las 14,4 milliardas francs duain las Viafiers federalas survegnir, bunamain ina milliarda la Viafier retica. Quai èn passa 100 milliuns francs dapli che quai che la RhB ha survegnì la davosa perioda, il 2017 enfin il 2020.
Gronda part per sanaziuns
Ina gronda part dals daners vegn la Retica ad investir en la sanaziun da viaducts e tunnels. Cumpareglià cun autras viafiers svizras posseda ella bleras construcziuns d’art, bun in tschintgavel da l’entira rait maina sur punts e tras tunnels. E la sanaziun da quellas construcziuns ch’èn per gronda part pli che 100 onns veglias custa.
Vegn vitiers che la Viafier retica sto enfin la fin dal 2023 avair bajegià enturn las staziuns, uschia ch'ellas correspundan a la lescha davart l'egualitad da persunas cun impediments. L'onn passà ha la Viafier retica investì passa 255 milliuns francs en il mantegniment e l’engrondiment punctual da sia infrastructura.
Las consequenzas finanzialas da la crisa da corona vegnian lavuradas si a moda separata e n'èn betg part da quest sboz, ha communitgà il Cussegl federal.