La Svizra ha pers set plazs en la rangaziun annuala davart las stentas per la protecziun dal clima. Quai mussa il rapport «Climate Change Performance Index» 2022 publitgà il glindesdi a la conferenza dal clima da l'ONU a Sharm el-Sheikh en l'Egipta. La Svizra è da nov schizunt davos l'Egipta, las Filippinas e l'Uniun europeica sin il 22avel plaz, scriva il WWF.
Blera critica
La Svizra survegn cunzunt schlettas notas en connex cun las finamiras da sviluppar energias regenerablas fin 2030 ed il consum d'energia per abitant. Era tar la politica da clima naziunala na vegn la Svizra betg giuditgada bain – quella sa basia anc adina sin la debatta da 2010. Impurtant saja uss da nizzegiar las pussaivladads da midar la politica da clima, uschia constattescha l'index da clima.
Cumparegliaziun internaziunala
Per l'index vegnan cumparegliads 59 pajais e l'Uniun europeica cumpletta. Criteris èn la politica dal clima, las emissiuns da gas cun effect da serra (Treibhausgase), il consum d'energia e las mesiras per energias regenerablas. Ils emprims trais plazs èn dentant libers – perquai che anc nagin pajais è sin in percurs che maina a la finamira dad 1,5 grads.
