Ils davos dus onns ha la cumissiun dal Fond Svizzer per la cuntrada (FSC) pudì garantir contribuziuns finanzialas a 210 projects en l'autezza da total 8,8 milliuns francs. Il dumber da las contribuziuns concedidas sco er il dumber da dumondas da sustegn per il temp da gestiun mussan puspè ina tendenza creschenta.
Sustegnì ha il Fond Svizzer per la cuntrada FSC tranter auter:
- reparar mirs sitgs en las muntognas
- renatiralisar auals en la Bassa
- realisar in guaud da chastagners istoric al Lai da Genevra
- renovar tetgs da crap en aclauns tessinais
- novs paltauns per amfibis ed abitadis per mustailas
Dapi sia fundaziun il 1991 ha il Fond sustegnì passa 2'900 projects ed impundì bunamain 160 milliuns francs en tals u sumegliants projects.
Acziuns novas ed a la tschertga dad ideas innovativs
Suenter trais decisiuns da prolungaziun dal Parlament federal po il FSC cumenzar il 1. d'avust 2021 ses quart decenni ed ha elavurà ina strategia per quella perioda. Il FSC vul cuntinuar cun sia activitad da promoziun cumprovada, però era metter novs accents.
