Las reacziuns da parlamentarias e parlamentaris e socialdemocrats grischuns
Il presidi da la Partida socialdemocratica grischuna aveva la sonda tar la nominaziun da Jon Pult in'inscunter a Mustér. Tar l'annunzia hajan tuts giubilà.
Per la Partida socialdemocratica grischuna è quai in di istoric, nus n'essan anc mai stads uschè datiers al Cussegl federal.
Ed era la collega d’uffizi da Jon Pult, Anna Giacometti ha gì grond plaschair.
Jau m’allegr enorm per Jon Pult, jau m’allegr enorm per noss chantun ed era per las linguas minoritaras che Jon Pult represchenta.
Sumegliant è il plaschair era tar la collega da partida ed anteriura cun-cussegliera naziunala Sandra Locher Benguerel ch'ha coordinà e coordinescha vinavant la candidatura da Jon Pult. Ed ella punctuescha ch'i dovria qua ina buna rait en il parlament che na sa furmia betg pir curt avant. I saja decisiv cun tgi ch'ins discuria e co ch'ins giaja vers quella glieud. Davart las candidaturas da la partida hajan 50 persunas decidì, en il parlament sajan quai lura 246 che decidian.
Martin Candinas da l'Allianza dal Center suppona ch'i vegnia fatg lavur da lobi per il Grischun las proximas emnas. E per el è era cler che sia simpatia giascha là danunder ch'el vegn, numnadamain en il Grischun.
Roman Hug, il nov cusseglier naziunal da la PPS è da l’opiniun che la nominaziun da Jon Pult è in grond success. El ha lavurà en il Cussegl grond cun Jon Pult.
Jau sai tge che Jon Pult sa e tge ch’el na sa betg. Per mai vegn ad esser interessant dad observar Beat Jans.
Sche Roman Hug vegn ad eleger Jon Pult, quai na po el però betg anc dir. Decisiv saja la figura che Pult e Jans fetschian durant ils hearings e betg be la derivanza.
Tge che las gasettas han scrit
Sonda suentermezdi ha la Partida socialdemocratica communitgà, che Jon Pult e Beat Jans vegnian sin il ticket per il Cussegl federal. Gia las ultimas emnas è vegnì rapportà vast dal cumbat electoral tar la PS. Ed er il resultat final, suenter 18 scrutinis, è vegnì commentà en las medias. Dapertut è da leger ch'igl haja duvrà blera pazienza per questa decisiun.
Per exempel scriva la NZZ ch'ils dus nominads n'hajan betg ditg bler suenter l’elecziun. Sco emprim stoppian els ramassar las emoziuns e suenter concentrar las forzas. Las atgnas persunas hajan pia persvadì, uss valia il medem per ils adversaris politics.
Il Tagesanzeiger prenda si l'aspect dal ticket dad umens. Evi Allemann ch’era l’unica dunna en la cursa n'è betg vegnida sin il ticket da la PS. Suenter il settavel scrutini era ella cun 20 vuschs e Beat Jans cun 29 vuschs a la testa. Dentant èn questas vuschs suenter plitost idas a Jon Pult. Evi Allemann ha gia per la segunda giada betg survegnì las vuschs per il ticket da la PS. Avant in onn tar la successiun da Simonetta Sommaruga ed uss tar la successiun dad Alain Berset.
Ed era Blick scriva da victurs e perdents e perdenta. Tenor la gasetta è Evi Allemann la gronda perdenta cun quai ch’ella n'è per la secunda giada betg arrivada sin il ticket. Era Daniel Jositsch vala sco perdent, era sch’el è popular a Turitg, para el dad esser in marginal en l’atgna fracziun. En pli saja Matthias Aebischer la fin finala stà senza schanza. Era Roger Nordmann n'ha betg cuntanschì il ticket, era sch’el era al cumenzament perfin in zic a la testa.
