Il center federal da perscrutaziun Agroscope dastga cultivar ierdi ch’è vegnì manipulà geneticamain en la vischnanca da Reckenholz en il chantun Turitg. L’Uffizi federal d’ambient ha dà la lubientscha per in tal experiment a partir da questa primavaira enfin l’atun 2026. Per cultivar plantas ch’èn vegnidas manipuladas geneticamain per l’intent da perscrutaziun dovri ina lubientscha en Svizra.
Dapli racolta cun ierdi manipulà
L’experiment duaja mussar sche la racolta possia uschia vegnir augmentada. Tenor Agroscope è quai gia stà il cas tar ris e ravun. L'ierdi pertutgà è vegnì tratg e mutà geneticamain cun la metoda Crispr/CAS9. Ensemen cun l'Universitad libra Berlin vul Agroscope observar, co las plantas creschan sin il prà. Quai sut cundiziuns severas, per che nagin material mutà sa derasia ordaifer l'intschess da l'experiment.
Discussiun globala
La manipulaziun da plantas cun Crispr/CAS9 vegn discutada cuntravers en plirs stadis. L'emna passada ha il parlament da l'Uniun europeica decidì da schluccar la regulaziun severa per la tratga da talas plantas. En Svizra è la producziun agrara libra cun plantas mutadas geneticamain scumandada tras in moratori – sco excepziun po l'Uffizi federal d'ambient dar lubientschas per la perscrutaziun. Cunquai ch'il moratori vala mo anc enfin la fin dal 2025, vegn il Cussegl federal a far en il decurs da quest onn ina proposta, co regular questa dumonda per l'avegnir.