Mintga quart sgol da helicopter fa la Rega durant la notg. E per ch'ils pilots possian s'orientar meglier en il stgir ha la Rega cumprà novs apparats d'observaziun a radis infracotschens. Dapi quest'emna sajan ils novs apparats en funcziun, scriva la Rega.
Ils apparats ha la Rega laschà construir extra, mintga exemplar custa inclusiv il svilup 25'000 francs. Las investiziuns totalas per il project muntan a radund 1,2 milliuns francs.
Maletgs nair/alv empè da verdent
Ils novs apparats genereschan in maletg en nair/alv e betg sco enfin ussa in verdent. Cuntrasts, furmas e sumbriva sajan cun quests novs apparats pli bain visibels. Ed ils egls na vegnian era betg uschè spert stanchels.