La Svizra duai dublegiar la milliarda da coesiun per l'Uniun Europeica. Da quest avis è la cumissiun per la politica exteriura dal Cussegl naziunal. I saja quasi in'emprova da tuttin'anc salvar la collavuraziun tar programs sco «Horizon Europe» ed «Erasmus plus», ha ditg il cusseglier naziunal Eric Nussbaumer, ch'ha fatg la proposta.
Cun la summa da coesiun dublegiada duai il Cussegl federal survegnir en maun insatge concret per tractativas, per uschia pudair dar in signal politic a Brüssel. Brüssel ha numnadamain signalisà ch'in svilup svelt ad ina relaziun reglada saja pussaivel sche la Svizra fetschia ina proposta concreta.
Ils 26 da matg aveva il Cussegl federal sistì da sia vart las contractivas davart la cunvegna da basa cun l'Uniun europeica. Dapi lura è la relaziun tranter la Svizra e l'UE sa sfradentada.
