L’Uniun sindicala svizra na sustegna betg il sboz per il mandat dal Cussegl federal da manar discurs cun l’Uniun europeica. Quai ha suttastritgà il president da l’uniun sindicala Pierre-Yves Maillard, envers la «NZZ am Sonntag». Ins saja lunsch davent da chattar ina cunvegna. Tranter auter stoppia la protecziun da las pajas esser garantida, uschia Maillard.
Mez december aveva il Cussegl federal infurmà sco la relaziun cun l’UE duaja vesair ora. Quest sboz cuntegna las directivas tenor quellas che la Svizra vegn a s'orientar durant las tractativas. Pia in mussavia per ils proxims discurs cun Brüssel. Quel ha il Cussegl federal decis suenter plirs discurs da sondagi cun l'Uniun europeica. L'element central dal pachet è l'access senza obstachels al martgà intern da l'UE.
Paucs dis suenter la Svizra ha era Brüssel deliberà il sboz per in nov mandat da tractativas. Detagls dal mandat n'èn betg enconuschents e betg publics. Tenor communicaziun da l'UE cumpiglia quest però l'access da la Svizra al martgà da l'UE, propostas per il dossier da la libra circulaziun da persunas ubain era cundiziuns per che la Svizra possia puspè far part al program da perscrutaziun da l'UE «Horizon Europe».
Or da l'archiv
