La Svizra rinforza sias stentas cunter la resistenza a l'antibiotica.
La populaziun duai purtar enavos ils meds antibiotics betg pli duvrads - en l'apoteca u tar il medi. Quest appel fa l'Uffizi federal da sanadad BAG.
Il diever excessiv u betg correct da antibiotica possia contribuir al svilup da resistenzas tar las bacterias. Quest svilup saja da constatar sin l'entir mund.
Uschia daventia difficil u perfin nunpussaivel da tractar talas infecziuns cun antibiotica, scriva il BAG.
I dovra ina meglra serenaziun
Tar l'antibiotica e las bacterias resistentas a l'antibiotica saja problematic ch'ellas arrivan entras ils excrements d'uman ed animal en l'ambient. Radund la mesadad da las bacterias resistentas arrivian entras «activitad umana» en lais e flums, ha ditg Michael Schärer da l'Uffizi federal d'ambient.
Las sereneras en Svizra retegnan tenor Schärer enavos 99% da las bacterias resistentas. Tar ferma plievgia saja dentant la chanalisaziun surchargiada ed uschia possia aua betg filtrada vegnir en las auas. Ord quai motiv vegnan meglieradas las sereneras uschia che las microimpestaziuns, inclusiv las bacterias resistentas, pon vegnir eliminadas da l'aua. Fin il 2040 duain radund 70% da las sereneras esser equipadas cun ulteriurs stgalims da serenar.
RR novitads 12:00
