Concret han 78% da las persunas pensiunadas dumandadas sustegnì l'iniziativa per ina 13avla renta dals sindicats e la sanestra. Tar persunas sut 34 onns saja il sustegn be stà tar 49%. En egl dettia ch'igl haja betg dà grondas differenzas tranter umens e dunnas ed era nagin foss tranter citads e campagna. Quai concludan ils auturs da la retschertga.
Sper persunas sur 65 onns hajan era persunas cun entradas bassas ditg Gea. Uschia hajan stgars 70% da las persunas cun entradas enfin 4'000 francs ditg Gea. Da l'autra vart hajan be stgars 40% da las persunas cun entradas autas da passa 16'000 francs ditg Gea ed uschia refusà l'iniziativa.
Campagna d'adversari n'ha betg persvadì
La retschertga mussa era che la campagna dals adversaris è fruntada sin critica. Cunzunt la brev d'anteriuras cusseglieras ed anteriurs cussegliers federals a persunas pensiunadas cun l'appel da refusar l'iniziativa n'ha betg persvadì. 80% da las persunas dumandadas ha resentì quai sco deplazzà.
Il suveran svizzer ha acceptà cun 58% l'iniziativa che vul ina 13avla renta.
