Las socialdemocratas ed ils socialdemocrats renvieschan l'iniziativa da spargnar custs da l'AdC. Pia na sustegnan omaduas partidas betg mintgamai las iniziativas da l'autra partida che duain sbassar las autas premias da cassas da malsauns.
Omaduas iniziativas vegnan avant l'urna ils 9 da zercladur. A la radunanza da delegadas e delegads ha Barbara Gysi (SG) giustifitgà la decisiun uschia; Il mecanissem da l'iniziativa da l'AdC pudess augmentar il squitsch sin il persunal da sanadad. Ina maioritad è stada persvadida da quai ed ha votà Na. Plinavant ha la partida decidì la parola da Gea per la lescha d'energia.
La brev da las anteriurs cusseglieras e cussegliers federals
Mattea Meyer, copresidenta da la PS, ha crititgà las tschintg anteriuras cusseglieras e cussegliers federals ch'èn s'exprimids cunter l'iniziativa d'ina 13avla renta d'AVS. En ina brev a tschient-millis persunas en vegliadetgna auta avevan els crititgà fermamain l'iniziativa.
Ils medems cussegliers survegnian ina pli auta cumpensaziun per la chareschia che las pensiunarias ed ils pensiunaris d'ozendi. Ed els survegnian ina pensiun da 200'000 francs l'onn, ha Meyer ditg avant las delegadas ed ils delegads da la PS.
Plinavant ha la partida prendì la finamira da terminar la paupradad en Svizra fin l'onn 2030. Las delegadas ed ils delegads han deliberà in document da posiziun en chaussa.