Ils temas da la PS
- Dapli raps per la classa mesauna: cun l'iniziativa per distgargiar las premias e l'iniziativa da canortas, vul la partida procurar che cunzunt famiglias en la classa mesauna han puspè dapli raps en la bursa.
- Locaziun: La PS sa focussescha sin ils pretschs da locaziun ch'explodeschan ed en quest connex sin la mancanza d'abitaziuns. La partida examinescha actualmain differentas propostas da soluziun, tranter auter er ina iniziativa dal pievel en chaussa.
- Politica da clima: Ensemen cun ils Verds ha la PS lantschà ina iniziativa per in fond da clima che promova ina renovaziun ecologica e las energias alternativas.
- Egualitad: La PS è la partida da l'egualitad. Ella vul s'engaschar er vinavant per ils medems salaris e per las medemas rentas per tuttas e tuts. Perquai lantscha la partida tranter auter il referendum cunter la refurma planisada da la 2. pitga.
Sutga chauda per la PS
È vossa parola per las elecziuns gartegiada? In'autra partida empermetta «dapli raps per viver», e vus giais cun «capacitad da cumprar» en il cumbat electoral.
Michal Hohl: I va gea tar omaduas parolas per il medem, ch'ins haja dapli daners ch'ins po cumprar la rauba – e quai è simplamain ina communicaziun sincera.
Cun ina iniziativa vulais vus limitar las premias da la cassa da malsauns. Daco betg reducir ils custs là nua ch'els vegnan stgaffids, en il sistem da sanadad?
Michal Hohl: Quai èn omadus impurtants puncts. Per l'ina da distgargiar la populaziun da questas premias, quai è vairamain in problem. Per l'autra èsi er da guardar, nua èsi d'investir per ch'ils custs na creschian betg pli fitg. Qua è la situaziun dentant bloccada tras tut las gruppas d'interess en il sistem da sanadad.
En il Cussegl dals chantuns ha la PS mo pli sis sezs. Daco na concurrenzescha la PS en il Grischun betg ils cussegliers actuals Martin Schmid e Stefan Engler?
Michal Hohl: Nossa finamira è da tegnair noss segund sez en il Cussegl naziunal, e che l'Allianza dal clima è represchentada a Berna. Nus vulain er che la populaziun ha la schelta tranter plirs candidats, stuain dentant er ans dumandar: tge resulta per nus, e quantas resursas custi.
- è co-presidenta da la Partida socialdemocratica Surselva
- è en la suprastanza dad Ilanz/Glion
- lavura sco magistra
- è naschida il 1985
- è da Castrisch
E tge pensa la glieud sin via da la PS?
Nus avain dumandà glieud sin via e politichers e politicras tge ch'els pensan da la PS. Sin questas dumondas e pretensiuns ha lura Michal Hohl dà resposta.
ChatGPT descriva la PS
Sche la Partida socialdemocratica survegniss tut ils sezs en il parlament
La situaziun da partenza
Il resultat en las elecziuns naziunalas dal 2019 è stà istoricamain bass (16,8%). Entant ha la partida puspè schlantsch, il davos en las elecziuns chantunalas a Turitg cun in lev plus. Er las retschertgas prognostitgeschan che la PS resta stabil u cuntanscha in lev plus.
Tops en la davosa legislatura
- Cunter in bloc burgais e l'economia è la PS sa messa atras tar la votaziun davart la taglia anticipada e la taxa da bul.
- La partida sa profilescha plinavant sco partida che promova las dunnas, nagin'autra fracziun ha ina pli auta cumpart da dunnnas che la PS.
- La PS ha mess atras in schlargiament da la norma penala d'antirassissem. Er persunas omosexualas vegnan protegidas meglier.
Flops en la davosa legislatura
- Tar lur iniziativa «per in spazi d'abitar pajabel» ha la partida stuì supportar ina terrada.
- Er la votaziun davart la refurma da l'AVS ha la partida pers, in dals temas ch'è impurtant per la partida.
- Durant la legislatura ha ella pers trais sezs en il Cussegl dals chantuns (FR/SG/TI) ed ha be anc sis sezs, uschè pauc sco la davosa giada il 1999.
La PS grischuna
L'elecziun da Sandra Locher-Benguerel en il Cussegl naziunal è stà ina surpraisa il 2019. Uschia ha la PS gudagnà vitiers in segund sez. Damai ch'ella na candidescha betg pli, sto la partida tremblar anc pli fitg da pudair tegnair quest sez che sch'ella avess recandidà.
