Nagin sustegn per l'iniziativa da la PS. Delegadas e delegads da l'Allianza dal Center han oz ditg Na a l'iniziativa a lur radunanza. L'iniziativa pretenda ch'ins sto maximalmain pajar 10% da las entradas per premias da la cassa da malsauns. Ella vegn ils 9 da zercladur davant il pievel.
Quai che surmunta ils 10% da las entradas duain tenor l'iniziativa Confederaziun e chantun surpigliar. Per l'AdC n'è quai dentant betg ina schliaziun, mabain simplamain in cumbat cunter sintoms. L'atgna iniziativa da franar ils custs da sanadad vegn dentant sustegnida cun ina maioritad da 166 encunter 27 vuschs e 22 retegnientschas. La PS, ch'ha er gì ses di da partida, ha medemamain renvià l'iniziativa da l'AdC.
Il president da la partida Gerhard Pfister è plinavant vegnì reelegì per quatter ulteriurs onns. El ha tratg ina buna bilantscha da las elecziuns passadas, tema dentant per la coesiun da la Svizra. La Svizra stoppia esser dapli ch'ina «plattafurma da fatschentas senza valurs». Er per l'economia saja la Svizra gest attractiva pervia da quai ch'ella saja dapli che mo ina plazza d'economia.