Roman Hug, il president da la Partida populara è uss da nov er cusseglier naziunal. El n'haja betg quintà ch'el survegnia in sez a Berna, uschia ha el ditg curt suenter l'elecziun. Il motiv per quest resultat è tenor el che la partida saja creschida, quai na saja betg sia prestaziun persunala. Plinavant haja er Thomas Roffler sco president da l'Uniun purila dal Grischun pudì gudagnar bleras vuschs per la partida.
Magdalena Martullo survegn cumpagnia a Berna
Ch’ella ha fatg il segund meglier resultat, cun quai è ella cuntenta. Dentant quai che fa bler dapli plaschair a Magdalena Martullo, è che la partida haja pudì gudagnar in segund sez, sco er cuntanschì il meglier resultat da partida. Il proxim pass saja da crescher vinavant sco partida e da pudair represchentar sias electuras ed electurs en il Cussegl grond ed en la regenza grischuna.
Per la proxima legislatura a Berna dettia avunda temas da tractar, sco Martullo ha aschuntà. Tranter auter il conflict en il Proxim Orient, ils contracts bilaterals cun l’UE ed il provediment d’energia.
Jon Pult è uss il sulet socialdemocrat
Jon Pult è fitg cuntent cun ses resultat persunal. Sche sia candidatura per il Cussegl federal ha gì in'influenza sin quai, na sa el betg dir. La finamira saja vinavant da tranter auter sviluppar in pajais social sco era la politica dal clima.
Che la PS n'ha dentant betg pudì defender il segund sez è Pult fitg trumpà. L'Allianza dal clima n'ha betg pudì cuntanscher in tuttina bun resultat sco avant quatter onns. Quai che fetschia fitg mal. Daco che la PPS ha fatg tantas vuschs, haja tenor Pult probabel da far cun la conjunctura dals temas. Il clima na saja betg pli stà il tema numra 1.
Er il president da partida Andri Perl è trumpà che sia partida perda in sez, ma la Partida socialdemocratica haja fatg in bun resultat, meglier ch'il 2019. Donn saja che las partidas alliadas hajan pers uschè bleras vuschs. La colliaziun da glistas haja procurà per il segund sez avant quatter onns e quest onn chaschunà ch’ins haja puspè pers el.
Martin Candinas cun grondas emoziuns suenter il resultat
Ch'el fa il meglier resultat da tut las candidatas e candidats, cun quai n'ha Martin Candinas betg quintà. Surtut perquai ch'el n'ha betg pudì far in cumbat electoral sco auters, cunquai ch'el haja gì bler lavur en l'exteriur. Ils proxims quatter onns vul el «dar gas» e far tut il pussaivel per il chantun, sco quai ch'el ha ditg en l'intervista cun RTR.
Er il president da partida Kevin Brunold è fitg cuntent cun ils resultats da sia partida. L’Allianza dal Center ha defendì omadus sezs, quel da Stefan Engler en il Cussegl dals chantuns e quel da Martin Candinas en il Cussegl naziunal. Quai demussia che la fusiun haja funcziunà. Da conquistar in segund sez en il Cussegl naziunal na hajan els betg planisà. Lur strategia saja stada correcta, in segund sez na saja betg stà probabel.
Anna Giacometti sin il tschintgavel plaz
Malgrà il mender resultat da las elegidas ed ils elegids, ha Anna Giacometti fatg dubel uschè bleras vuschs sco avant quatter onns. Uschia ch'ella è fitg cuntenta cun il resultat. Per sia proxima perioda a Berna vul ella rinforzar sia posiziun en la cumissiun da finanzas, sco era far in pèr bunas propostas per il chantun Grischun, sco ella ha ditg en l'intervista cun RTR.
Er il president da partida da la PLD Bruno Claus è fitg cuntent cun il resultat da sia partida. Per l’ina che Martin Schmid ha pudì defender ses sez en il Cussegl dals chantuns, sco er Anna Giacometti ses en il Cussegl naziunal. Ch'Anna Giacometti è stada duas giadas sin la glista saja per l’ina stà impurtant per l’italianitad dal chantun, sco era per las dunnas, sco el ha ditg en in’intervista cun RTR.
Dischillusiun tar Verds e Verdliberals
Las partidas verdas han gì la finamira da defender il segund sez da la sanestra. Quai n'è dentant betg gartegià. Ils Verdliberals han fatg in quart pli paucas vuschs che tar las davosas elecziuns il 2019. La partida Verda ha pudì confermar il resultat da la davosa giada, perda dentant sin champ naziunal fermamain.
Ils motiv per quel regress vesan quellas partidas surtut en ils temas: tar las davosas elecziuns era il clima bler pli preschent. Ils Verdliberals vesan plinavant la mancanza da Josias Gasser sin lur glista sco motiv ch’aveva adina fatg bleras vuschs. Quest onn avevia la partida plitost preschentà bleras persunas novas.
