- Sper Magdalena Martullo da la Partida populara ch’è puspè vegnida reelegida, va da nov er Roman Hug per la PPS a Berna. El remplazza uschia la socialdemocrata Sandra Locher-Benguerel che n’ha betg pli candidà.
- La Partida socialdemocratica ha uschia cun Jon Pult be pli in sez en il Cussegl naziunal.
- Per la Partida liberaldemocrativa va Anna Giacometti in'ulteriura legislatura a Berna.
- Martin Candinas da l'Allianza dal Center ha era defendì ses sez e quai cun il meglier resultat da tut las candidatas e candidats.
Roman Hug va a Berna
Il tschintgavel sez mida tradiziunalmain en Grischun sia colur. Questa giada va el cun Roman Hug puspè en mauns da la Partida populara. El ha cun stgars 16'600 vuschs il nas anc avant la liberaldemocrata Anna Giacometti. La reelecziun da Giacometti veva dà da discutar cunquai ch'ella aveva survegnì concurrenza interna da l'anteriur cusseglier guvernativ Christian Rathgeb. La finala ha Giacometti tuttina fatg stgars 16'200 vuschs, quai ch'èn passa 6'000 vuschs dapli che Rathgeb.
Il trio a la testa Martin Candinas, Magdalena Martullo e Jon Pult han defendì suveran lur sezs. Candinas ha fatg cleramain il meglier resultat, segir ha el pudì profitar d'esser stà en il center durant ses onn presidial a Berna. Avant quatter onns aveva Martullo anc fatg il meglier resultat en Grischun. Questa giada è er Jon Pult da la PS sin ils chaltgogns da Martullo.
Qua datti ils resultats da tut las 122 persunas ch'han candidà en il Grischun:
Fermezza da glistas
Sco sin nivel naziunal è la PPS er la ferma partida en il Grischun. Ensemen cun la Uniun democratica federala ha questa allianza dretga fatg la finala 93'430 vuschs ed uschia recaltgà dus sezs. L'Allianza dal clima cun ils socialdemocrats, ils verdliberals e verds han fatg 87'058 vusch ed uschia n'hai betg tanschì da mantegnair il tschintgavel sez. La colliaziun amez cun Allianza dal Center e Partida liberaldemocratica ha fatg ensemen 110'600 vuschs e mantegn uschia ses dus mandats.
Tgi ha nua fatg vuschs?
La carta suandanta mussa co il suveran ha elegì tenor vischnanca e candidat.
