Siglir tar il cuntegn

Header

video
Organisaziuns da protecziun da l'ambient grondas na sustegnan betg il referendum
Or da Telesguard dals 16.01.2023.
laschar ir. Durada: 3 minutas 5 Secundas.
cuntegn

Revisiun lescha da chatscha Grondas organisaziuns da l'ambient na sustegnan betg referendum

Las grondas organisaziuns da l'ambient han annunzià da betg sustegnair il referendum cunter la revisiun da la lescha da chatscha. Sin basa da la nova lescha saja ina coexistenza da luf ed uman pussaivla.

Pro Natura Svizra, WWF Svizra, BirdLife Svizra e la Gruppa Luf Svizra na sustegnan betg las organisaziuns pli pitschnas sco l'Uniun per proteger animals selvadis. Quellas avevan piglià il referendum avant in pèr emnas.

I va per la revisiun da la lescha da chatscha ch'il parlament svizzer ha decidì la stad passada. Quella dat liber il luf per la chatscha, sut tschertas cundiziuns. Las organisaziuns da l'ambient n'èn betg stadas cuntentas cun quella midada.

audio
Referendum senza organisaziuns grondas
ord Actualitad dals 16.01.2023. Maletg: RTR
laschar ir. Durada: 3 minutas 8 Secundas.

Arguments e nagina chapientscha

Il president e mainafatschenta da l’Uniun da proteger animals selvadis, Roberto Babst n’enclegia betg questa decisiun. Surtut perquai che las organisaziuns grondas crititgeschan era intgins puncts en la lescha da chatscha adattada. Dad ina vart è Roberto Babst dischillus, da l’autra vart è el betg segir schebain i dat anc auters motivs che la protecziun dal luf.

Sche davosvart èn vegnidas fatgas cunvegnas cun partidas, na sun jau segir... jau hai il sentiment ch'igl è marschà insatge.
Autur: Roberto Babst Uniun per proteger animals selvadis

Per exempel èn quest onn elecziuns naziunalas. Anita Mazzetta, la mainafatschenta da WWF Grischun fa cler, che da quests aspects na hajan giugà nagina rolla tar la decisiun. WWF Grischun è da l'avis che ina co-existenza cun il luf è pussibla. Tenor ella haja la lescha buns aspects e che i dependa sco che la lescha vegn messa enturn. Decisiv sajan ils suandants puncts:

  1. Che la populaziun dals lufs resta segirada
  2. Che las mesiras vegnan rinforzadas e messas enturn consequentamain
  3. Che l'effect positiv sin la regiuvinaziun dal guaud vegn resguardada

La coexistenza tranter luf ed uman è decisiva

Las organisaziuns scrivan en ina communicaziun da medias ch'ellas na crain betg che la populaziun da lufs saja periclitada cun la revisiun da la lescha. Quella saja substanzialmain pli stricta che quella ch'il suveran ha refusà il 2020.

Impurtant saja, che las «cundiziuns da segirtad» vegnan resguardadas tar l'implementaziun da la lescha. Tenor quellas na duai betg dar «zonas libras da lufs», e da sajettar in entir triep duai mo esser pussaivel en cas excepziunals.

Las organisaziuns pitschnas ch'han piglià il referendum han temp fin il cumenzament d'avrigl da rimnar 50'000 suttascripziuns.

RTR novitads 14:00

Artitgels legids il pli savens

Scrollar a sanestra Scrollar a dretga