Radund 50'000 tonnas da vestgadira vegnan per onn rimnadas en Svizra tenor l'Uffizi federal per ambient. Suenter la rimnada suonda la zavrada. Circa dus terzs da la vestgadira sajan anc en uschè in bun stadi ch'ella po anc vegnir purtada. Quella vegnia per gronda part vendida en l'exteriur, cunzunt en l'Europa da l'ost, en la Russia, l'Africa ed en il proxim Orient.
La fatschenta Texaid rimna la gronda part da la vestgadira en Svizra e po vender 58 % en butias da second hand. Tenor Philipp Stoller, il mainafatschenta da Texaid Svizra, vegn la vestgadira zavrada tenor martgà: vestgadira d'enviern per pajais subtropics per exempel fetschia natiralmain pauc senn.
Tge capita cun il rest?
17 % da la rimnada da Texaid vegn elavurà a lumpas per l'industria. 17 ulteriurs pertschients vegnian reciclads e pon tenor Philipp Stoller per exempel vegnir duvrads per l'isolaziun. Il rest, tar Texaid 8 %, sa tschenta en il rument.
Co vesa la situaziun ora concret en il Grischun?
Il chantun registrescha mo las cifras, sch'ins surdat la vestgadira ad ina vischnanca, tenor Alois Degonda da l'Uffizi per natira e l'ambient dal Grischun. La vestgadira ch'ins metta en in container, per exempel da Texaid, na vegn betg registrada. Che circa dus terzs da la vestgadira po anc vegnir purtada, valia dentant pli probabel era per il Grischun. Per prender Cuira sco exempel d'in lieu concret: Tenor infurmaziun da la citad da Cuira èn 45'300 kg vestgadira vegnids rimnads l'onn 2022, pia circa 1 kg per abitant ed abitanta.
Cumprais Vus second hand?
Sch'ins observa persunas sin via che portan vestgadira da tutta sort, sa dumondan ins magari sche quella vestgadira è nova u second hand. Per far l'emprova il test en il martgà vegl da Cuira.
Blera glieud di che la vestgadira ch'ella porta n'è betg second hand. Tuttina ha la gronda part gia cumprà almain ina giada second hand e gia chattà l'in u l'auter stgazi.
