Il president dal cussegl d'administraziun dal concern d'armaziun svizzer Ruag, Nicolas Perrin, sa retira. Quai è ier suentermezdi vegnì enconuschent. El tira las consequenzas d'in rapport da la controlla federala da finanzas EFK.
Il rapport ha chattà irregularitads tar la cumpra da panzers Leopard 1 da l'Italia. Tranter auter na saja la cumpra dals 96 panzers mai vegnida preschentada a la direcziun da la RUAG. Quai fiss atgnamain prescrit. Perrin ha ditg envers SRF davart quai: «Nus avain midà bler, e lura capitan sbagls.»
Lunga preistorgia
El aveva spetgà passa in onn avant ch'infurmar il Departament federal da defensiun VBS davart ils panzers. La Confederaziun è la possessura da la Ruag. En revista avess el fatg quai pli svelt, di Perrin envers SRF. Il VBS ha gia annunzià ina investigaziun externa pervia dals panzers.
Il rapport da l'EFK documentescha sper las irregularitads er ils auts custs da magasinaziun dals panzers, e crititgescha er la collavuraziun da la Ruag cun il concern tudestg GLS. Plinavant datti renfatschas da corrupziun cunter in anteriur manager da la Ruag, che vegnan intercurids independentamain.
Er il VBS vegn crititgà en il rapport. La Ruag ha vulì vender ils panzers en la Germania, il Cussegl federal n'ha dentant betg dà la lubientscha. La controlla federala da finanzas ha sa mussà «surprendida» ch'il VBS ha pir discutà questa fatschenta cun la Ruag suenter la decisiun dal Cussegl federal, er sche la vendita fiss stada politicamain sensibla. La Germania avess dà vinavant ils panzers en l'Ucraina.
